السلام عليكم ورحمة الله تعالى وبركاته
,,,اتمنى أن يكون جميع الاعضاء بخير وسلام
وان شاء الله تقدروا تعاونوني باش نلقى هذا الطفل هههه
كاين موضوع هكا باقي جاي في بالي من مدة خاصة كي نقرا واحد الجرائد
وهذا الموضوع يديروا في جرائد ياسر جزائرية كانت ولا عربية كيف كيف
الموضوع هذا يتعلق بالزواج عبر الجرائد ,,,كاين في بعض الجرائد وين
يديروا صفحة مخصصة للزواج والبحث عن العرسان ولا العريسات ههه
وين يحط الرجل معلومات عليه وتحط المرأة معلومات عليها باش تحاول تلقى
الرجل الي يناسبها ولا يلقى الراجل المرأة الي تناسبها هذه الظاهرة مانكذبش عليهم
مش عاجبتني طول والفكرة ماتدخلش للراس يعني هو الراجل هذا الي داير طلب يحوس على
مرأة باش يتزوجها مالقاش وين يسكن الكل مرأة تناسبه ولا هو لهذا الدرجة ماعرفش سن
المرأة الي تليق بيه ولا يليق بيها وثاني المرأة تصبر شوي ههه حتى الزواج ودايراته تقول تسول
انا نحس في بعض الناس كيما هكا وحسب تفسيري الخاص ممكن تكون عندهم حوايج مش مليحة
في حياتهم ويلجؤوا لهذه الطرق ويقولك الطرف الآخر مايعرف عليا والو نظن هكا ,,,
واش يزيد يحير تلقاها مراة نقولو على سبيل المثال نخيروا ولاية العاصمة تقولك انا فتاة من العاصمة مثلا عمري 26 سنة جامعية لدي مسكن خاص
هههه وتروح تشكر في روحها جميلة وحنونة وتتحمل المسؤولية
أبحث على رجل مابين 30/35 سنة يتحمل المسؤولية ورجل شهم وووو
وحبذا يكون من ولايات الشرق ولا الغرب ولا الشمال ولا الجنوب هكا يذركوا منطقة ثاني هههه يتشرطوا وزيادة على هذه مرات يزيدوا يطلبوا حتى الوظيفة مرة يقولك يخدم تاجر ولا في سلك الأمن ولا الصحة ولا التربية ههه ,,,
وكيف كيف الراجل يبدأ يقولك اسمي كذا أعمل بوظيفة مرموقة ههه مش كيما البنت الي قبل ولدي وظيفة خاصة أريد اتمام نصف ديني رجل شهم وقد المسؤولية أريدها جامعية وسنها لا يفوق كذا وكذا
لا مشكل ان كانت ماتعرفش طيب ههه 
لأنها زوجتي الثانية ههههه 
حتى وين المطلقات ثاني ولو يحطوا هكا ويحوسوا على رجالة والمطلقين ثاني والمشكلة شفت حتى البنات الصغار تلقاها عمرها تسعة عشر سنة مازال مافات عليها والو تبدأ تقولك نحوس من تو على راجل تقولك انا ماكثة في البيت ومرات تقولك انا جامعية والله نحير يعني واش القصد وراء هذا؟؟؟؟؟
المهم بلا مانطول حبيت نعرف رأيكم في هذا الموضوع يعني الرجالة ماولوش يعرفوا يحوسوا على البنات وحدهم وعلى الطفلة الي رايحة تسعدهم وتكون زوجتهم المستقبلية ولا الطفلة ولت سلعة هكا هات برك تحوس على راجل بلا ماتعرف اصلوا وفصلوا وتخلي روحة تمسخيرة في الجريدة
مانعرف الا الحق معاهم ولا مع مـن الي حبيت نعرفوا رأيكم في الموضوع,,,وعذرا على الاطالة